Thalmual Khua Tangthu Thu masa

Thalmual Khua Tangthu Thu masa

Thalmual khua tangthu bu hong bawl theisak i biak Pasian min i phat masa hi. Kawlpi khua-a om Thalmual makai pawlkhat in Thalmual khua tangthu bu bawl ding thukimna khat kinei hi. Laibu bawl dingin mun tuamtuam a om Thalmual khua mite tawh Committe kiseh dingin hoih kisa-a, ahi zongin kizopna haksa ahih teh ci-in Kawlpi-a om teng Committee kiseh hi. Committe te’n Thalmual khua tangthu kaikhawmin, Pa Tun Khan Kap in Computer tawh hong khetsak ahih manin, Pa Tun Khan Kapte innkuan Topa’n thupha hong piaksak ta hen.

Thalmual khua-ah min nei zaw diak le madawk zaw deuh hausate, kumpi nasemte, Pasian nasemte le nasep tuamtuam pan gualtung tuang zaw diakte kisuaksak hi. Ahi zongin a kicingin hong kipuak kim lo ahih manin, a kisam tampi om kha ding hi. Hong kipuak banglian a hong kisuaksak lo, aki tom lak zong om ahih manin kithei siam ni.

Bang hangin Thalmual Khua Tangthu Kibawl Hiam?.. A Deihna-a Nuai a Teng ahi hi.
1. Thalmual khua thu i theihna ding:- Bang kumin Thalmual khua kisat a, kuate- in na sat a, kua nam, kua beh teng na teeng khawm uh hiam? Beh nam khat le nam khat koici bangin na kikhawl in, na ki-it uh hiam? Nidangin bang biakna om a,tu-in bang kibia hiam?.. Tua biaknate koici bangin hong lut a, kua tengin na sang masa uh hiam? Nidangin bang kisem a, tu-in bang kisem hiam? Khantohna bang teng om hiam cihte akipan, khang thak te in a theih ding uh a kisam tampi om hi. Mun dangah lal khia-a, mundangah a piang Thalmual khua a mu ngeilo Thalmual mi tampi ki-om ta hi. Tuate adingin Thalmual khua koi lai-ah om a, khua mite koici nuntak uh hiam cihte zong theih ding kisam veve hi.

2. Gam le lei kep siamna ding:- Leitang, khua hun, singkung lopate it a, i kep siam ding kisam mahmah hi. A diak- diakin Thalmual khua-a teeng mite’ tavuan ahi hi. Thalmual khua kisat tung akipan entoto lehang mailam ading thu khual le muhna tangzai hausa upa te- in khua hun hoihna ding, leitang hoih na dingin singkhaam(rkD;judK;0kdif;) le patau kangmei tu- ak,inntuan daipaamte’ sing lak pak nadingin khua huai singkhaam (aus;7GmbkHajr) ci-in khang khualna tak tawh na nasem uh a, gam mawk hal lohna ding na khaam uh hi. Mailam hun saupi a khualna uh tawh Taaksing mawk phuk loh ding nakpi takin khaam in kem uh a, i gam etlawmsak mahmah hi. A hi zongin mipi ading mailam thu khualna a neilo, ang sung bek a thei hausa upa pawlkhat hong khan ciangin, sing khaam khempeuh phuk maimang bek tham loin,singkhaam leitang khempeuh logam dingin hawm mang zaw lai uh hi. Taaksing khempeuh sum tawh zuakin phuk maimang uh a, i gam pen gamkeu suaksak uh hi. Tua ahih manin tulai khang thakte-in, i gam hong no suahkik theihna dingin,leitang, khua hun, singkung lopate aki pan gam sung ganhingte dongin, bangci kep ding cih geel siam a,hoih takin i kep ding kisam mahmah ta hi. A khangto gamten singkung lopate phuk loin it mahmah suan beh uh a, gamsa, vasa te kap mawkmawk loin, it bawlin zual sak mahmah uh hi.

3. Khantohna ding:- Thalmual gam pen khua hun hoih in leitang hoih ahih manin, akiciing, a kituh, aki suan khempeuh hoih mahmah hi. Ahi zongin neek tawm khop bek kiciing ahih manin khantoh zawhna ding bangmah om lo hi. Tu-in mawtaw tungta ahih manin, nek tawm bek hi nawn loin, khantoh zawh nading aki zuak thei sing-gah kungte ciin huai mahmah ta hi. Tua bek tham loin, inn sing akizang thei ding, Taaksing, dols- ing,hiang sing cihte akipan singkung manphate i suan ding hun ta hi. A gah neek theih ahi, zawngtah,thawhbat,leengkung, tam- paza,leengthei, sahawk, siing, aisan, zasan kungte tampi na ciing lehang, mun dangah puak kul loin,na inn phualah, na lo lai-ah, a kung tungah mi te’n hong lei ta ding uh hi. sial, bawng, sakol, keel, vok cihte tampipi khawi leeng, khan tohna lianpi hong om ding hi. Khantohna le neihsate a dokkik mang thei ahi, zu le kham theih guih theih zavom, zakaang, kanza, zateep, tuibuk, khaini, kunza, kunpong cihte, i zat het loh dingin hanciam ni.

4. Ki-it kilemna ding:- Koi mun koi mun tung taleeng Thalmual mite i tuntunna-ah ki-it in, kilemin, kipum khat a, i om theih ding thupi pen hi. A ci mawhte kihuh in, a gual zote i kipahtawi siam ding zong thupi hi. Khua khat ah teeng khawm, tuinak khat dawn khawmin, a khing asa-aki neekpihte i hi hi. Beh le phung a tuamtuam i hih hangin, numei pasal vai tawh sungh le pu-aki man te vive i hi hi.

5. Khua le tui, i vei kim tek theih nading:- Thalmual khua pan khua dang, mundang, gamdang a tung tampi ki om ta hi. I omna le i teenna munmun pan i khan khiatna Thalmual khua mangngilh het lo a, i phawk tawntung nading le, Thalmual khua’ kisapnate huhin i panpih theih bang ciatin, i panpih zawh nading, veina le deihsakna taktak i neih nading kisam pha mahmah hi. Ka khua ka tui hi nawn kei ci loin, veina le deihsakna taktak i neih nadingin, mun tuamtuam a omte hong hanciam ciat ta-un.

6. Pasian zahtak nading:- Thalmual khua sat zawh aki pan tuni dong (4) vei i khua kicim khin hi. Bang hangin i khua kicim pahpah hiam? Pasian tungah khialhna lianpi khat nei uh hi ding hi, ci-in mi dangte’n hong muhna uh ahi hi. Tua mah bangin eite’ lam panin zong lungsim kisuanna tampi om hi. Zu le sa tawh nuamsa-in Pasian thu- i thudon lohna, numei pasal paktatna, khat le khat kimuh dahna le ki-elna, kilang neihna,kihazaatna, kimawh sakna,zumkong mangkong kitutna, zin le leengte gal bawl khakna,zukham, an kham in khat le khat kivuakna, kisatna, kithahna dongin, siatna i bawl hi. Pasian’ deih loh zu le kham theih guih theih tuamtuamte i zatna hangin siatna tampi hong tung hi. Ahi zongin Pasian in kamciam hong piakna-ah, “Ka mite kiniamkhiat in,thungen in ka mai hong zong a,amau gitlohnate panin a ki kheel uh leh amaute’ khialhnate maisak in, a leitang uh ka hoihsak ding hi,” ci hi.(2Khang 7: 14) Pasian zahtakin Pasian deihna bangin nungta ni.

Hih laibu i bawl na pan Thalmual khua thu i theih nading, gam le lei -i kep siam nading, khantoh nading, ki-it kilem nading, khua le tui-it a, i vei kim tek nading, Pasian zahtak nading deihna bulpi ahi hi.

Sia On Khan Pau B.A.,B.C.Min
Kalaymyo