Thalmual Khua Tangthu Editorial

Thalmual Khua Tangthu Editorial

Thalmual khua tangthu sunga gelh ding ih kaih khop thute kum 4 kum 5 val sawt khin a, tu-in hong kisuaksak zo pan hi. Laibu sung a kigelh mun leh gam min pawlkhatte tuhun adingin a thupi khol-lo tawh a kibat hangin tu zawh khang nih khang thum hun teh a kithei nawn lo ding pawlkhat om a, tuate kong gelh hi. Gentehna in, “BUAL leh KHUAPI” cih bang pen tuhunin kiteeng nawnlo ahih manin mailam hunah khangnote in thei nawn hetlo ding ahih teh a theih dingun hong kihel ahi hi.

KHUAPI akici pen khua sat cilin a kiteen masakna hi a, hun khat ciangin teenna ding mun kicinglo banah tui neek ding mah mah zong kicing zo nawnlo ahih manin, BUAL lam ci-in veeng min na vawhin teeng uh hi. Tuhun a veeng nih “Taakzang le Vomgiahbuk” i teen dan mah tawh a kibang ahi hi.

Hih laibu sungah mimal tangthu pawlkhat hong kigelh a, tuate kiphatsakna lam a laak ding hi zaw loin, mailam hunah khangnote’ et-teh theih ding deihna hizaw hi. I pianna gam le lei kemin mapang khawm a na ih sep diamdiam ding deihna ahi hi. Thu hong kipuak khempeuh hong kipuakna bangin hong kisuaksak kim zolo ahih manin kisang siam ni. Tangthu tuamtuam tampi a om hangin ciamtehna kibang kimlo tampi om ahih manin a hoih pen ding le a telnop pen dingin hong kisuaksak ahi hi.

A diakdiakin khua leh tui, gam le lei-it in a puah mite’ tungah lungdam kohna ih nei hi. Mailam hunah khangnote in gam le lei-it in a puah nuam, a kem nuamte’ adingin a et tehhuai mahmah mite a hihna uh Thalmual khua tangthu sungah ki ciamteh hi. A pil khempeuh in khua leh tui ading bangmah na hoih sem tuan lo a, a hau khempeuh in zong mipite’ adingin na hoih bangmah sem tuan lo hi. Tua ahih manin haksatna kawm kalah ahih theihna bang ciat in, khua le tui ading na hoih a sem mite hih Thalmual khua tangthu sung pan i pahtawi hi.

Thalmual khua kisat hunin mun tuamtuam pan leh beh tuam, minam tuamtuam ki sutuah ahih mah bangin, hun khat lai-in khua sung kampau’ kizangh pen Saizang pau, Val pau, Teizang pau cihte kizang a, tuhun ciangin ahih leh kua minamte’ kampau cih om tuan loin Thalmual pau bek kizangh hi. Thalmual pau’ tawh biakna kipia khawm in, Thalmual meh kine khawm a, nuam kisa mahmah hi. Zu le sa hawmna khempeuh zong kua mite’ tatdan cih omtuanlo in Thalmual tatdan in ki gamta hi.

Hih Thalmual khua tangthu tawh kisai in aki cinglo tampi om ding ahih manin, mailam hunah a kicing zaw leh a thupi semsem in i bawl’ zawhna ding, khangno te’n tuhun a thu piangte ciamteh a, thu hoih thu manpha tampi ih kaihkhop na dingin khangnote’ tungah tavuan pia in khang ih ki vaikhak hi.

a) Hong ki-um vua mualtui von tawi, pianna sang sul bang kan ve ni e.
b) Pianna sang sul bang kan ve ni, koi pan mawng zung bang kipeem hiam aw.
a) Tuan pupate’n khuambang phuhsa pianna gamlei gia bang zun leeng e.
b) Lunglau lo aw mualtui von tawi, Sian in zing vai hong hawm ding a, vangkhua nibang hong taang na diai e.

Rev. Tun Khan Kap
Kalaymyo