Laibu Committee tungpan Lungdam Kohna
A beisa 1991 kum a kipan Thalmual khua tangthu (article) aki- kaikhawm hi a, mangthang het loin, tu-in i mit mahmah tawh mu-in sim theihin hong om ahih manin Thalmual khua tangthukante le laibu bawl Commitee-te’ tungah i lungdam hi. Tham loin i beh i phung ciat ah beh thu phung thute a kipan tangthu hoih tuamtuam hong puakte’ tungah lungdam’thu kong ko uh hi. Hun sawt lua-a sa zong tampi a om dingin ka um uh hi. Ahi zongin laibu zawh ding a hun ciangtan om tuan sam lo hi. Hih Thalmual khua tangthu tawh kisai mi khat bek i ngaihsutna tawh a kigelh hi loin, beh makaite’ tungah thu hong puak un, ci-in 2 vei ta kizasak hi. Beh makaite hong puakna tawh kizui-in hoih takin a ki-et khit ciangin hong kisuaksak ahi hi.
Thalmual khua mencipna huhau in mun tuam gam tuam a om Thalmual tate le khua-ah a teeng laite in zong beh thu phungthu-ah i kizop dimdiamna kuamah in thei kim loding ahih manin, hih Thalmual khua tangthu i bawl’na hangin mi khat leh khat midang kuamah om loin, sungta putu, i hihna le nopna dahna munte-ah ankuang ankeu-uum khawm in, a dah khawm a lungdam khawm mite i hi hi.
I pu i pate hun lai-in gal-aih, sa-aihna le tonh na, zu nun na te-ah na kithu tuak mahmah uh a, a bei a tawp dongin na kilungdam pihin lasa khawmin na laam khawm ziahziah uh hi. Thusia nei khat peuh a om leh tanau in lemtuah masa in, a lep zawh het kei leh khua vaihawm upate’ tungah kitun pan uh hi. Khua sung hausa upa vaihawm te in zong, tungsiah zum a kitut lohna dingin nakpi takin lemtuah uh a, dan a kipiak uh leh zong a neu thei pen dingin mawhna dan kipia uh hi. Kolbulh khauban a kituaksak kuamah omlo hi. Hih pen Thalmual khua ta-a, lawki kuamah ki om nawn lo ahih manin i biak Pasian zahtak a khat le khat i ki-it diamdiam theih ding a thupi pen ahi hi. Khut khial ban khial, kampau khial a om leh zong, mawhna i kimaisak hun ding hita hi. Tungsiah zum kitut loh ding le thusia ih deih het loh ding Thalmual tate hanciam ciat ni. Peemta lungsim nei loin picing lungsim i neih ding hanciam ni.
Pasian pen ki-itna le kilemna Pasian hi a, a ki-it a kilem mite’ tungah Pasian thupha hong tung ding hibek hi. Thusia bekbek na bawl’ a, thusia bekbek na ngaihsut leh na suan na khakte’ adingin, samsiatna-a sapsak na hih khak ding lauhuai hi.
Hih laibu sungah hun khat lai-in Thalmual khua pen khua hoih mahmah le a thupi mahmah khua-ahihna le a dah huai mahmah a hihnate zong kihel hi. Tuate -en kak zel a laibu nasim ding kong deihsak hi. Tuhun laitakin Thalmual khua pen, i pu i pate’ sepsa leh bawlsa khempeuh kisia mang khin ta-a, singkung lopate nangawn bei-in gam kolh hong suak ta hi. Tua hi a, i pu i pate’ hun lai tawh kibangin gam hoih, nuntak gim nam hong suah kik theihna dingin, khangnote in gam le lei-it in i kep ding hun hong tung ta hi. Zatna ding om lopi in singkung mawk phuk loding, gam hal lo ding, taakno a kipan singno suan hahkat ding hi hang! Kham theih zu- akipan kumpite deih loh nate sem het loin a nungta Pasian’ deihna tawh kituakin a nungta Thalmual tate hi ding hi hang!
Mailam hunah khua sung vaihawm hausa sem dingin khang- note in gam it taktak, a thupi khual mite bek teel ding hi hang! Khua le tui ading nasem lutang khat peuhpeuh in, deidan tuam nei loin khua mite a it kim theih ding kisam masa pen hi. Ihpu ihpate hun lai-in zuhai, sabaak tawh na kizom dimdiam uh a, midang a kingaihsun kuamah na om hetlo uh hi.
I biak Pasian in thupha hong pia ding a, sum le paai zongte zong hong lawhcing ding uh a,i gan khawi’ te zong a ciing om lo ding hi. Lokho nasemte zong a khawhsa kham ding uh a. nuntakna thak Topa’n hong pia ding hi. I nuntakna-ah Pasian zahtakna tawh mite adingin Pasian in kamciam tampi hong pia hilo hiam? (Late 112:1-4) Hih laibu a sim mite phattuamna khat teitei om dingin ka lamen uh hi. Pasian in thupha hong pia ta hen!.
Leave a Reply