Thalmual Khua satzia leh Gam leina

Thalmual Khua satzia leh Gam leina

Tua hun laitakin tuhun a Tedim gam khempeuh Falam Ukpi gam ahi hi. Thalmual khua sat khit ciangin mun kip gam kip le khua kip a suah theihna dingin Falam Ukpi Con Bik tungah lei kul hi. Tua ahih manin Thalmual gam leitang lei nadingin beh makaite le khua mite kikum khawmin a nuai a bangin kisehin Falam Ukpite tungah va lut uh hi. Tua hun laitakin Thalmual khua inn (17) pha hi.

1. Pu Eng Ngul (Halkik) Dangka tang Rs 250/-
Sialtal tongsu khat Dangka tang Rs 100/- manding a seh
Vekpi gawm:- Rs 350/-

2. Pu Vum Pau (Sukte) Sialtal tongsu Rs 100/- man ding a seh
Ciingpheek khat Rs 6/- man ding a seh
Namsau khat Rs 8/- man ding a seh
Vekpi gawm:- Rs 114/-

3. Pu Lam Nek (Buansing) Dangka tang – Rs 40/-
4. Pu Lam Phung (Halkik) Dangka tang- Rs 40/-
5. Pu Dam Tun (Naulak) Dangka tang – Rs 40/-
Vekpi gawm:- Rs 120/-

6. Tangpi inn 12 te, innkhat Rs 5 ciat: Rs 60/-

Thalmual gam leitang leina sumbei vekpi: Rs 644/- bei hi.

A tung a khua mite’n inn khat Rs 5/- a piak banah Malgam a teeng Dam Hau leh Vungh Tual in khipi tang (3 ) tawh hong huh hi, ci-in kiciamteh hi. Falam Ukpite’ tungpan gam neih theih nading phalna a ngah khit uh ciangin, Thalmual gam leitang lei a,a va pai beh pupite’ tungah gam le lei hutna dingin Falam Ukpi Con Bik in a nuai a Pupite’ tungah Zo thau lawng 6 pia hi.

1. Pu Eng Ngul (Halkik)
2. Pu Vum Pau (Sukte)
3. Pu Lam Nek (Buansing)
4. Pu Dam Tun (Naulak)
5. Pu Suah On (Buansing)
6. Pu Lam Phung (Halkik)

Pu Eng Ngul thaulawng pen tuni dongin Pu Vial Za Do(Halkik) inn-ah kimu thei lai hi.
Pu Vum Pau’ thaulawng pen tuni dongin Pu Cin Kham (Sukte) inn-ah kimu thei lai hi.
Pu Lam Nek thaulawng pen tuni dongin Pu Vial Za Nang (Buansing) inn-ah kimu thei lai hi.
Pu Dam Tun thaulawng pen tuni dongin Pu Khai Suan’ (Naulak) inn-ah kimu thei lai hi.
Pu Suah On thaulawng pen tuni dongin Pu Thang Khan Sut (Buansing) inn-ah kimu thei lai hi.
Pu Lam Phung thaulawng pen tuni dongin Pu Thawng Khan Do (Halkik) inn-ah kimu thei lai hi.

Note:- Hih Zothaulawng 6 te pen khuasat thau, ahih kei leh
(Taangthau) kici hi.