Thalmual Khua satna

Thalmual Khua satna

1896 kumin a nuai a bangin beh makaite kipawl khawm in Mual-lum gam panin Thalmual khuasat uh hi. A khua satna kiim mual dung ah Thalsingkung tampi po ahih manin Thalmual ci-in khua min na phuak uh hi.

A tung a Thalmual khua sat pupite’ teen masakna pen Kaptel khua-ahi hi. Mun tuamtuam pan hong pai-in Kaptel khua- ah na teeng khawmin nuamsa mahmah uh hi. Ahi zongin 1892 October ni 9 ni-in Thaangmual (Fort White) a om Myo-ukpa Thun Win kisuam lum hi. Myo-ukpa a suam mite lakah Kaptel khua makaite kihel uh a hih manin, 1893 January ni 3 ni-in Mangkang kumpite in Kaptel khua mei tawh hal uh hi. Kaptel khua le khua kiim khua paam kilauthawng mahmah ahih manin, Kaptel khua nusia in galtai ciat uh hi. Mun tuamtuam-ah a kitai kekna lakah, i gensa Thalmual khua sat pupite pen Kaptel pan Mual-lum gamah na lalin na teeng uh hi. Muallumah kum 3 tuuk a tun khit ciangin, 1896 kumin Mual-lum pan Thalmual khua na sat uh hi. Khua sat beh makai pupite a teen uh ciangin Thalmual gam -a na teeng masa Vaiphei mi,Thangniang, Thangeu le Khaute inn
3 tawh a kisim khawm, inn 17 na teeng uh hi.

THALMUAL KHUA SATMA HUN
Thalmual khuasat ma-in Thalmual gam sungah Vaiphei mite mun 3 ah na teeng uh hi. 1. Khuata 2. Khua mun 3. Khuatung zaang cihte ahi hi. Khua tungah a teen hun sungin sawmgiak(- sawmtaang) khat kithat a, lup sia naupang khat bek suakta hi, kici hi. Tu ni dongin Vaiphei mite’ inn mun le a suangphahte a kipan misi vuina han mun leh a luguhte kimu thei lai hi. Vaiphei mite lak pan gam le lei ngak ding leh, misi luguhte a keem a vil dingin kinusia uh a, Thangniang beh, Thangeu beh le Khaute beh ahi uh hi. Tuni dongin amaute Thalmual ah teeng lai uh hi.

THALMUAL KHUA SAT PUPITE
1. Pu Eng Ngul (Halkik)
2. Pu Vum Pau (Sukte)
3. Pu Lam Nek (Buansing)
4. Pu Dam Tun (Naulak)
5. Pu Lam Phung (Halkik)