Thalmual Khuasat pupite hong paikhiatna

Thalmual Khuasat pupite hong paikhiatna

1) Halkik beh Innkuan
2) Sukte beh Innkuan
3) Naulak beh Innkuan

Hih a tung a beh innkuan 3 te hong kipatkhiatna uh kibang hi. Tua tham loin hong tonkhawm kawikawi uh ahih manin, a tuamin kigelh tuan lo hi.

Valvum khua-a teeng, Halkik suan ahi, Pu Go Dam tapa Zuan Lam pen lokho mi a hih mah bangin a khawhsa khamin mite’ neihsa duh gawh lo hi. Hun khat ciangin Valvum pan hong paikhia in Kaptel khua beel hi.

1893 Kaptel khua a kihal ciangin Go Dam tapa Eng Ngul(Halkik), Khup Pau tapa Vum Pau( Sukte) leh Dam Tun (Naulak) beh pupite tawh Hiang Awn tung khawm uh hi. A maute Hiang Awn-ah kum 5 sung teeng uh hi.

Hiang Awn khua-ah a om laitakun, Pu Dam Tun (Naulak) Pu Lam Phung (Halkik) makai-in Kaptel khua ukpi Pu Thuam Thawng’ phalna tawh Saibeng dingin kuan khia uh hi. Nahlaan khua taw Laili zaangah giahphual sat uh hi. Gamvakna-ah Pu Lam Phung in Saikaang khat kap liam hi. Pu Dam Tun in kap huan pih hi. Saikang si pah loin tho zel puk zel in a om laitakin, Pu Dam Tun in a thau thun mengmang in singkung golpi khat tungpan khau kaaisuk khat sat-tat in luai phei a, Saikang tung a tuksuk lian leh kap thuah a, tua panin Saikang man zo pan uh hi.

Pu Dam Tun in Saikang a kap khit phetin a kimkot-ah thakhat thu in sun Ni sapi mah in guah zu-a, Sakhituihuup in Pu Dam Tun le Saikang kalkak hi. Khanglui hun lai-in sakap liam masa peuh mah sa manin seh uh a hih manin, Pu Lam Phung Sai manpa hong suak hi.

Tua Saikang pen vaang nei mahmah le a cing a keem om takpi hi, ci-in khanglui mite in na ciamteh uh hi.
Saibengte Hiang Awn khua hong tun kik uh ciangin Pi Niang
Khawl in a tupa Pu Dam Tun laphuah hi.

(a) Phung tawh ciamlo sawn tawh ciam ing, Huisai ka sianga mung e.
(b) Sawn sinlai khuai bang hang hiam aw, von banzal tawi liim hiam aw.

Hih a tung a beh makaipite pen 1892 kum, Kaptel khua Mangkang te-in a hal uh ciangin, Hiang Awn nusia-in Muallum zuanin hong pai khia- uh a, beh dang pupite tawh Muallum-ah hong teeng khawm uh hi. 1896 kum ciangin Buansing beh, Suante beh pupite tawh kipawl in Thalmual khua na sat khawm uh hi.

Thupuak,
Pa Tun Khua Thang (Naulak beh makai) (9-10-1989)